5 маусым — Дүниежүзілік қоршаған ортаны қорғау күні. Бұл күн жаһандық экологиялық мәселелерге назар аудару және табиғатқа ұқыпты қараудың маңыздылығын еске салу мақсатында белгіленген. Толығырақ...
Бас Ботаникалық бақ — қоршаған ортаны қорғау мәселелеріне ерекше көңіл бөлінетін аумақ. Сонымен қатар мұнда өсімдіктер дүниесін, оның ішінде сирек кездесетін және жойылып кету қаупі бар түрлерді сақтау мен қалпына келтіру жұмыстары жүргізіледі. Ботаникалық бақ республикалық маңызы бар ерекше қорғалатын табиғи аумақ (ЕҚТА) мәртебесіне ие.
Сондықтан мұнда арнайы ережелер қолданылады:
- Өсімдіктерді, гүлдерді (сондай-ақ олардың бөліктері мен жемістерін) жұлуға болмайды. Мұнда өсімдіктерге ерекше мән беріледі, олар тамашалау үшін өсіріледі. Сонымен қатар олардың көпшілігі ғылыми коллекциялық қордың құрамына кіреді. Сол себепті тек арнайы жабдықталған жолдармен және соқпақтармен жүру қажет, көгал үстімен жүруге болмайды.
- Пикник ұйымдастыруға болмайды. Бұл артық қоқыстың жиналуына жол бермеуге, көгалдар мен өсімдік отырғызылымдарын зақымдамауға, сондай-ақ тағам иісі мен қалдықтары арқылы кеміргіштерді тартпауға көмектеседі.
- Аққулар мен балықтарды тамақтандыруға болмайды, өйткені олардың азық рационы арнайы мамандармен таңдалған. Сәйкес келмейтін тағам мен суға түскен қоқыс олардың денсаулығына зиян келтіруі мүмкін. Сонымен қатар бұл тоғандағы сүзгілердің бітелуіне және су сапасының нашарлауына әкеледі.
Ботаникалық баққа келушілерге арналған толық ережелермен botsad.kz сайтында танысуға болады. Бұл шектеулер тек алғашқыда ғана қатаң болып көрінуі мүмкін. Шын мәнінде, олар тірі коллекцияны және табиғаттың нәзік тепе-теңдігін сақтауға бағытталған.
Осы ережелердің барлығы Ботаникалық бақты өсімдіктер, жануарлар және адам үйлесімде өмір сүретін бірегей табиғи кеңістік ретінде сақтауға арналған. Оларды сақтай отырып, біз қоршаған ортаны қорғауға және табиғи алуантүрлілікті сақтауға өз үлесімізді қосамыз.
