2025 жылғы 7–8 қарашада Ақтау қаласындағы Маңғышлақ эксперименттік ботаникалық бағында Қазақстанның табиғи флорасына тән жеміс-жидек өсімдіктерін көбейту, сақтау және ұтымды пайдалану мәселелеріне арналған ғылыми-тәжірибелік семинар-дөңгелек үстел өтті. Толығырақ...
Семинар тақырыбы еліміздің Батыс, Шығыс, Орталық және Солтүстік өңірлерін қамтыды, ал басты мақсат – елдің азық-түлік қауіпсіздігін нығайту.
Семинарға Қазақстанның түкпір-түкпірінен жетекші мамандар мен ғалымдар қатысты. Ботаника және фитоинтродукция институты атынан б.ғ.к., А.Д. Жаңғалиев атындағы жемісті өсімдіктерді жерсіндіру және гендік қорды қорғау зертханасының меңгерушісі Мұқан Гауһар және ғылыми қызметкер Анар Санқайбаева қатысты.
Семинар барысында жеміс-жидек өсімдіктерінің генетикалық қорын сақтау жөніндегі көпжылдық зерттеулердің нәтижелері жан-жақты талқыланды. Қазақстанның әртүрлі өңірлерінен алынған жеміс-жидек өсімдіктерінің табиғи популяцияларын зерттеу және интродукциялау әдістері бойынша маңызды жетістіктер ұсынылды. Сонымен қатар молекулалық және биотехнологиялық зерттеу әдістерінің озық бағыттары, генетикалық полиморфизм мен морфологиялық әртүрлілікті анықтау мәселелері ерекше назарда болды.
Талқылаулар белсенді әрі конструктивті түрде өтті, бұл Қазақстанның бірегей өсімдік мұрасын сақтау және елдің азық-түлік қауіпсіздігін нығайтуға бағытталған болашақ ғылыми жобалар үшін берік негіз қалайды.
Бұл семинар отандық биология, экология және ауыл шаруашылығы ғылымдарының дамуына маңызды үлес қосқан айтулы іс-шара болды.
