Ботаника және фитоинтродукция институтының ұжымы Валентина Андреевна Самойлованы айтулы мерейтойы — 80 жасқа толуымен және ұжымымыздағы еңбек жолының 50 жылдығымен шын жүректен құттықтайды! Толығырақ...
Валентина Андреевна сонау Дағыстанның Грозный облысындағы Кизляр қаласында дүниеге келген. Еңбек жолын 1964 жылы Қазақстан жерінде бастаған. Киров атындағы Қазақ мемлекеттік университетінің биология факультетін «биология және химия пәндерінің оқытушысы» мамандығы бойынша тәмамдаған Валентина Андреевна өмірлік жолын ерекше арнаға бұрып, өзінің бүкіл кәсіби ғұмырын ботаника мен өсімдіктер әлемін зерттеуге арнады.
1976 жылдан бастап Валентина Андреевна Ботаника және фитоинтродукция институтында еңбек етіп келеді. Ол аға лаборант қызметінен бастап, Өсімдік ресурстары, Гербарий, Флораның жоғары сатыдағы өсімдіктері, Өсімдіктер интродукциясы, кейіннен Дендрология зертханаларында ғылыми қызметкерге дейінгі еңбек жолынан өтті.
Ұзақ жылдар бойы П.М.Мырзақұловтың жетекшілігімен Қаратау флорасын зерттеп, гербарий материалдарын жинауға қатысты. Валентина Андреевна бірнеше апта, тіпті айлар бойы палаткаларда тұрып, далалық және шөлейт аймақтардың аптап ыстығына, нөсерлі найзағайлы жаңбырларға төтеп бере отырып, табиғаттың қатаң әрі ғажайып ортасында өткен ұзақ мерзімді далалық экспедицияларға қатысты.
Ғылыми қызметі барысында Валентина Андреевна Райхан Ауталиповна Егеубаеваның жетекшілігімен Қазақстанның эфир майлы, дәрілік және басқа да пайдалы өсімдіктерінің ресурстарын зерттеді. Оның 20 ғылыми басылымы жарық көрген. Сондай-ақ Валентина Андреевна С.А. Абдулинамен бірлесіп, «Қазақстанның тамырлы өсімдіктерінің тізімі» монографиясын дайындауға тікелей қатысты.
Валентина Андреевна — өте қарапайым, жауапкершілігі мол, өз ісіне шын берілген жан. Жиырма жылға жуық уақыт бойы, Бас ботаникалық бақтың партерлік бөлігіндегі «Шөптер мен гүлдер алаңы» құрылған сәттен бастап, ол осы аумақтағы өсімдіктерді өсіріп, күтіп-баптап, оның жұмысына жетекшілік етіп келеді.
Бүгінде оның коллекциясында біржылдық және көпжылдық өсімдіктердің 80-ге жуық таксоны бар. Оның еңбегінің арқасында бұл бақтың бірегей бұрышы өмір сүріп, дамып, жыл сайын келушілерді гүлдердің алуан түрлілігімен қуантады. Ол қыс мезгіліндегі көгалдандыру жұмыстарын да назардан тыс қалдырмайды. Әкімшілік ғимаратындағы барлық кабинеттерде оның күтіп-баптаған өсімдіктері отырғызылған кем дегенде бірнеше гүл құмырасы бар.
Оны шын мәнінде өсімдіктердің сиқыршысы деуге болады: өсімдіктер Валентина Андреевнаның мейірімі мен қамқорлығына әрдайым мол өсіп, жайқалып гүлдеу арқылы жауап береді.
Ғылыми және еңбек жолындағы үлкен жауапкершілігіне қарамастан, Валентина Андреевна — аяулы жар, екі баланың анасы, немерелері мен шөберелерінің сүйікті әжесі әрі ардақты прабабушкасы. Ол әсемдік жаратып, айналасындағы өмірді көркейте білетін ерекше жан.
Мерейтойыңыз құтты болсын, Валентина Андреевна! Сізге шын жүректен зор денсаулық, жан жылуын, сергектік пен сарқылмас күш-қуат тілейміз! Өміріңіз әрдайым сүйікті өсімдіктеріңізге, әсемдікке, ізгі жандарға және қуанышты сәттерге толы болсын!
