Соңғы күндері әлеуметтік желілер мен бұқаралық ақпарат құралдарында ботаникалық баққа келушілердің келу ережелерін бұзғаны туралы көптеген бейнематериалдар таралуда. Осыған байланысты Ботаникалық бақ әкімшілігі жағдайға түсініктеме беруді жөн көреді. Толығырақ...
Көктемгі кезеңде Алматы қаласының Бас Ботаникалық бағында келушілер саны әрдайым артып, адам ағыны едәуір көбейеді. Қонақтардың басым бөлігі белгіленген ережелерді сақтап, аумақ пен оның тіршілік иелеріне құрметпен қарайды. Алайда, өкінішке қарай, кейбір келушілер тарапынан орынсыз мінез-құлық жағдайлары да кездеседі. Ережелердің бұзылуы, әсіресе келушілер ең көп жиналатын күндері, шынымен де тіркелуде.
Бас Ботаникалық бақ әкімшілігі бұл маусымдағы келушілердің көптеп келуіне алдын ала дайындалып, келесі шараларды жүзеге асыруда:
- Қазіргі уақытта тоған маңына қоршаулар орнату жобасы әзірленуде. Алайда бұл үдеріс жылдам емес, себебі мемлекеттік сатып алу рәсімдерінен өту қажет және бірқатар техникалық шектеулер бар (тоған аумағында жер асты коммуникациялары орналасқан, оларды орнату кезінде зақымдауға болмайды). Қазіргі таңда қауіпсіз, эстетикалық талаптарға сай әрі экожүйеге зиян келтірмейтін бірнеше нұсқа қарастырылуда;
- Тоған аумағында күзет қызметінің кезекшілігі күшейтілді;
- Қызметкерлер үшін құқық бұзушылармен жұмыс және жанжалсыз қарым-қатынас бойынша арнайы тренингтер өткізілді. Қызметкерлер бұзушылықтарға жедел әрекет етіп, келушілерге түсіндіру жұмыстарын жүргізуде;
- Аумақта орналастырылған ақпараттық және тыйым салатын белгілер саны арттырылуда;
Біз бейжай қарамай, ереже бұзушыларға ескерту жасайтын келушілерге алғысымызды білдіреміз — дәл осындай ортақ жауапкершілік аумақты сақтауға көмектеседі. Өз тарапымыздан қауіпсіздік шараларын күшейту және кеңістікті ұйымдастыру жұмыстары жалғасуда.
Сондай-ақ, тағы бір мәрте еске саламыз: Бас Ботаникалық бақ ерекше қорғалатын табиғи аумақ мәртебесіне ие және мұнда белгілі бір шектеулер мен ережелер қолданылады. Бақ аумағындағы барлық мінез-құлық ережелері жария оферта шартының ажырамас бөлігі болып табылады. Шарт талаптарымен botsad.kz сайтында танысуға болады.
